‘S e ‘Meanbh-chuileag’ ainm na h-iomairt dràma-oideachaidh a th’aig Fèisean nan Gàidheal a th’air a bhith dol bho chaidh a’ stèidheachadh le taic bho Fèis Dhùn Èideann ann an 2000.
A-nis stèidhte ann an oifis Fèisean nan Gàidheal ann an Inbhir Nis, bidh Meanbh-chuileag, as trice a’ sgrìobhadh is a’ toirt air chuairt dealbh-cluiche ùr gach bliadhna, is tha a’ bhuidheann air leth deònach èisteachd ri molaidhean airson dealbhan-cluiche ùra.
‘S ann air bun-sgoiltean Gàidhlig a tha a’ mhòr chuid den obair aig Meanbh-chuileag ag amas le dealbhan-cluiche agus bùthan-obrach ann an Gàidhlig ‘s thathar cuideachd an sàs ann am pròiseactan a tha freagarrach do roinnean Gàidhlig aig ìre àrd-sgoile.
Bidh Meanbh-chuileag a’ dèanamh dealbhan-cluiche agus bùthan-obrach sa Bheurla cuideachd le dealbhan-cluiche a’ togail air cuspairean ceangailte ri eachdraidh ‘s cultar nan Gàidheal agus a’ toirt cothrom do sgoilearan eòlas a chur air a’ chànan agus beagan Gàidhlig ionnsachadh aig an aon àm.
Tha na dealbhan-cluiche agus bùthan-obrach aig Meanbh-chuileag a’ toirt taic do sgoiltean ann a bhith ag obair a dh’ionnsaigh builean a’ Churraicealaim airson Sàr-mhathais a leanas:
- mothachail air cò ris a tha e coltach a bhith an làthair aig tachartas inntinneach agus brosnachail air a lìbhrigeadh le daoine eile
- ag àrdachadh agus a’ neartachadh ionnsachadh tro bhith ag obair còmhla ri companaidhean ealain proifeasanta, luchd-ealain agus buidhnean cultarach
- a’ leasachadh tuigse air cho beòthail, luachmhor ‘s a tha cultar nan Gàidheal – don chuid mhòir aca ann an sgìre na Gàidhealtachd, an cultar agus an cànan aca fhèin
Airson tuilleadh fiosrachaidh mu Meanbh-chuileag agus na dealbhan-cluiche aig a’ bhuidheann cuiribh fios gu Aonghas MacLeòid aig Fèisean nan Gàidheal.
